Орталық Азия

Шетелдік ғалымдар Абай университетінде бас қосты

Абай университетінде «Климат өзгерісі бойынша білім берудің болашағы: педагогтар мен стейкхолдерлер арасында синергия құру» Азиялық форум басталып, азиялық педагогтардың климаттың өзгеруі бойынша білім беру (ATECCE) жобасының II кезеңінің бірінші кездесуі өтті.

Форумның ашылуына Абай университетінің Басқарма төрағасы–ректоры Болат Тілеп, Окаяма университеті Тұрақты даму максатында білім беру орталығының директоры Хироки Фуджи, 2007 жылғы Нобель сыйлығының лауреаты Рае Квон Чунг, ҚР Президентінің жанындағы ҚР Ұлттық ғылым академиясының, Алматы қаласын дамыту орталығының, ЮНЕСКО-ның Алматыдағы өңірлік кеңсесінің өкілдері, Корея, Филиппин, Жапония, Индонезия, Үндістан, Қытай, Өзбекстан елдерінен келген сарапшылар қатысты.

Мақсаты – климаттың өзгеру мәселелерін шешу үшін білім беру мекемелері мен стейкхолдерлер арасындағы өзара тиімді ынтымақтастықты нығайту. Форум білім берудегі тұрақты даму мен инновацияға ықпал ететін бірлескен стратегияларды әзірлей отырып, білім және озық тәжірибе алмасу алаңын құруға бағытталған.

Болат Тілеп іс-шараның маңыздылығына тоқталып, педагогикалық білім берудің флагманы болып табылатын Абай университеті жасыл университет, цифрлық университет және педагогикалық зерттеу университетін құру жолында жаңа инновацияларды енгізе отырып, жаңа формациядағы педагог кадрларды даярлауда және ғылым саласын дамытуда әлемдік тәжірибені қолданылатынын атап өтті.

Іс-шараның салтанатты ашылуында Хироки Фуджи мен Рае Квон Чунгқа «Абай атындағы ҚазҰПУ-дың құрметті профессоры» атағы берілді.

Профессор Рае Квон Чунг қазіргі экологиялық зерттеулердің маңыздылығына тоқталып, өскелең ұрпақтың назарын Жасыл экономикаға аудару қажеттілігіне баса назар аударды. Ол сондай-ақ, климатты сақтау және оның өзгеруіне қатысты күресті тек қаржы, технология және экономика арқылы ғана емес, адамдардың ойлау қабілетіне әсер ету арқылы да жүргізуге болатынын және бұл жерде жоғары оқу орындары шешуші рөл атқаратынын атап өтті.

Іс-шараға қатысушылар білім беру бағдарламаларын климаттың өзгеруінің сын-қатерлеріне бейімдеудің, осы процеске стейкхолдерлерді тартудың және климаттың өзгеруіне тиімді әрекет етуге қабілетті білім берудің тұрақты экожүйесін қалыптастырудың өзекті мәселелерін талқылады. Форум озық тәжірибелер мен ғылыми зерттеулермен алмасуға ықпал етіп, Азиядағы экологиялық білім беру саласындағы болашақ ынтымақтастықтар мен жобалардың әлеуетін арттырады.

Форум аясында пленарлық отырыстар мен тақырыптық сессиялар өтті, онда Орталық Азиядағы климаттың өзгеруі саласындағы білім беру: прогресс және перспективалар; Азиялық педагогтардың климаттың өзгеруі бойынша білім беру бағдарламасы; Орталық Азия университеттерінің өкілдерімен Диалог: Өзбекстан және Қырғызстан, Тұрақты дамуға арналған студенттік стартаптар тақырыптарында негізгі мәселелер талқыланды. Климаттың өзгеруі саласында тиімді және жан-жақты білім беруді қамтамасыз ету үшін осындай бастамаларды жалғастыру қажеттігі атап өтілді.

 

Қатысты мақалалар

Пікір үстеу

Э-пошта мекенжайыңыз жарияланбайды. Міндетті өрістер * таңбаланған

Back to top button